THEI & MARIJ

15.00: De Beerendonck, beslaote optraeje
21.45: Houfpodium – 675 jaor Venlo
01.00: Keulse Kar

't Is 'n neet mier weg te dinke ónderdeil oet 't Nach-programma: 't optraeje ’s middaags spesjaal veur de bewoeëners van De Beerendonck. Euver 't optraeje det Thei en Marij dao vurrig jaor deje wuurt noow nog altied gepraot. Raeje genóg um dit duo, bekind van 't Veldboeket en al die andere successe, truuk te vraoge. Good niets: zeej zagte jao. Dus det wuurt weer 'ne hieële moeëje en gezellige middaag veur de bewoeëners van De Beerendonck!

Sinds 2001 huurt Tegele beej de gemeinte Venlo en dus deilt Tegele ouk in de feesvreugde róndum 675 jaor Venlo. In 2001 bestónd de Nach pas net en ware Thei en Marij al hieël lang aktief. Sinds daen tied hebbe zeej as inwoeëners van Groeët-Venlo hiel waat Nachte as arties meigemak! Op korte termien gaon de twieë eur dreeëndertigste jaor as zangduo in: ein prachtig jubilee veur artieste die al vanaaf eur prille begin in 't vastelaovessezoen erg vuuel optraeje. Aevel ouk door 't jaor haer zien Thei en Marij op vuuel plekke te bewóndere. Al zien die plekke zelde zoeë moeëj as venaovend, zoeë pal veur 't Venlose (en taegeswaordig dus ouk Tegelse) stadhoes. Kóm 't jubilee van Thei en Marij mei inluje en maak d'r 'n sjoenkelfeesje van!

Waeges succes geprolongeerd! Net as vurrig jaor kómme Thei en Marij De Keulse Kar op ziene kop zette. Det det aan 't ervare zangduo waal toevertrouwd is hoof neet vaerder oetgelag te waere. De optraejes van Thei en Marij bevatte altied 'n aantal ingrediënte: gezelligheid, erg moeëje leedjes én de wies wao op dit twieëtal perfek op ein ingespeuld is. Mit de choreografie die zeej hantere zoele zeej beej minnige wedstried hoeëge ouge goeëje: duit Thei 'n stepke, dan duit Marij 'n stepke en umgedreid. Kóm genete van dees twieë geroutineerde rasentertainers!