Oeuvre Pries-winnaer Neutjesrang

21:10: Hoofdpodium

Veur Neutjesrang waas de krink haos rónd. Nao 33 jaor makde Fred van den Bogaard, Paul Nagelmaeker en René Oostdam vurrig jaor bekind det zeej zoele gaon stoppe. In eur jubeljaor begós Neutjesrang aan waat de letste rónde meus waere. 't Kolderieke Venlose Trio bouwde in al die jaore 'n riek œuvre op, bestaonde oet leedjes, theatershows, straottheater en nog vuuel mier komische momente.

Aafgeloupe vastelaovessezoen trooj 't variététrio Neutjesrang nog einmaol op beej de verscheie vereiniginge, daonao woort d'r toegewerk nao 'n moeëj sloetstök in de vorm van dreej shows in De Maaspoort. In 't vruge veurjaor krege de hiere tot eur groeët plezeer te hure det zeej dit jaor de Veldeke Œuvre Pries zoele kriege. Neteurlik meus det nog maondelang stil gehalde waere, maar op det moment wiste zeej dus dat De Letste Rónde, nao de Maaspoortreeks, nóg 'n prachtig stertje zoel kriege.

Wies det 't in april inkzwart woort en Paul Nagelmaeker zoeëmaar inens storf. Zienen doeëd kwaam aan wie 'ne mokerslaag en in plaats van de feestelike sloetshows in De Maaspoort woort dao vuuels en vuuels te vruug d'n aafscheidsdeens van theaterman Paul gehalde. 'n Waerdig aafscheid mit vuuel traone, aevel ouk mit 'ne lach: persies zoeë as det beej Paul Nagelmaeker pasde.

In euverleg mit de femilie van Paul beslaote Fred en René det de oetreiking van d'n Œuvre Pries door kós gaon: Paul waas gruuets wie hae hoort det 't Trio ge-ieërd zoel waere en dus gebeurt det noow ouk. Neutjesrang haet in al die jaore hiel vuuel moeëjs gemak en wuurt vendaag op passende wies in 't zunke gezat!