KWANTE HIPPE


22.00, 23.00, 00.00: Galerie de Puddingfebriek, Holtstraot

De nieje cd én elpee van de hiere van Kwante Hippe is nog genne maond ald of zeej hebbe alweer 'n nie tóf projek: zeej verzörge dit jaor 't Getske van Gelök. De Venlose band behuurt zónder insige twiefel tot d'n top op dialekmeziekgebied en det ónderstrepe zeej nog maar ens mit eur album “Noow Ik Wakker Bin”.

't Is maar good det de hiere wakker zien, want zeej bringe maar leefs dreej sets in Galerie de Puddingfebriek. D'r zal óngetwiefeld vuuel werk van eur nieje plaat veurbeej kómme en getuge de succesvolle albumpresentatie zien d'r al hiel waat minse die eur nieje leedjes waord veur waord mit kinne zinge. “Röstig rup de Nach”, zoeë zóng fróntman Paul Breuer in de ierste single van de nieje cd en det hebbe weej dan ouk gedaon. Weej hebbe Kwante Hippe hiel röstig en kalm gerope en gevraog of zeej van 't jaor 't Getske wille verzörge. Tot ós groeët plezeer hebbe de hiere volmóndig ‘jao’ gezag. Of veur dich Kwante Hippe noow 't toetje of 't veurgerech van de Nach wuurt: in de Puddingfebriek zal 't d'r erg smaakvol aan toe gaon.