30 JAOR MINSEKINDER

MINSEKINDER & MARIACHI LOS TARASCOS


21.30: Houfpodium, Mert

Minsekinder besteit dertig jaor en de Nach haet de ier det de ónverwoesbare dialekmeziekhelde eur jubileum venaovend gaon viere. En det doon zeej op ein waal hiel spesjale wies. 't Is medio jaore tachtig as zenger Michiel van der Grinten op het platteland van Mexico woeënt. Ederen aovend pak hae zien gitaar van de moor um mit de manne oet 't dörp leedjes te zinge en, ierlik is ierlik, beer te drinke. Zoeë kwaam 't det “Cancion Mixteca” (later vertaald as Stad aan de Maas) en “Cruz de Oivido” (D’n boeët) euver de veranda klónke. Aevel ouk “Det duit ‘m ’t veurjaor” woort dageliks metgezónge, want det de lente in d'n alde Juan 't veur duit óntbrande, det snap edere Mexicaan.

Beej ziene truukkier in Nederland is 't muzikale veur van Michiel neet mier te douve en det beteikent oetintelik de start van Minsekinder. Zienen tied aan d'n andere kant van de waereld is good truuk te hure in de sound van d'n band: Minsekinder bringk 'n net zó'ne krachtige as prachtige mix van meziek oet Mexico, de Cariben, alletwieë de Amerika’s en Afrika en det alles neteurlik veurzeen van Limburgse tekste. Dertig jaor later viert de band op de Mert in Venlo eur jubileum mit versterking van Mariachi Los Tarascos. De viefköppige band wuurt zoeë twieë maol zoeë groeët, oetgebreid mit extra trómpette, fioeële en gitaar. Eine absolute aanraojer um d'r beej te zien: zoeë as venaovend zoogs se Minsekinder noeëts ierder. A la fiesta!