Zó’n 11 jaor geleeje haet eine klein gruupke Venlonaere ut initiatief genaome ein jaorliks truukkómmend dialekfestival te organisaere. Doel waas en is ein breid publiek in aanraking laote kómme met streektaalmeziék en 't Limburgse dialek. Dit doel wuurt nog altiéd naogestreef en weej wille muziekante, teksdichters en componisten bliéve stimulaere zich bezig te halde met ut Limburgse Leed. De stichting wilt de Limburgse dialect meziek versterke en vernieje door creatieve projecte te initiëre en te óndersteune.

In de aafgelaupe tieën jaor zien d'r al mièr dan 118 verschillende artieste en bands geboek in alle soorte en maote. Jaorliks boek de Nach zó’n 20 artieste. Beej 't boeke van artieste probeert de Nach altied nièje artieste ein plek te gaeve. Auk wuurt aandach bestaejd aan de combinatie tösse arties en locatie. Heejbeej probeert de Nach de geijkte combinaties te vermiede zoeëdet 't vaste keffeepubliek iets bizónders te zeen krieg, netuurlijk zónder de connectie tösse locatie en artiest oèt 't oug te verleeze. Teruukkómmende artieste staon zoeë vuuël meugelik op wissellende locaties.

De Nach van 2010 wuurt gesteund door haos 25 horeca-ónderneminge en det is klasse. Op verschillende podia staon 28 artieste, zeg maar ein dwarsdoorsneej van de dialekmezièk dae in Limburg op dit moment te huùre is. De ritmes varieere van rap tot chanson en de dialekte van Wanssum wiès Mestreech. De programmering is verspreid euver de ganse nach, zoeëdet neet idderein tegelièk speult en minse mièr bands en artieste kinne zeen en hure.

Vearder zien d'r samewerkingsverbande met andere Limburgse cultuurdragers zoeëas:
-Stichting Veldeke Krink Venlo
-Venlopartners
-Stichting Herfshane
-Stichting O.B. de Woers